काठमाडौं । हालै अष्ट्रेलियाको नेसनल युनिभर्सिटी एएनयूका वैज्ञानिकहरुले नौ अर्ब वर्षको सबैभन्दा छिटो बढ्ने ब्ल्याक होल पत्ता लगाएका छन् । यो प्रतिसेकेन्ड पृथ्वी बराबरको आकारमा वृद्धि भइरहेको बताइएको छ ।

यसको पिण्ड पनि सूर्यभन्दा ३ अर्ब गुणा बढी रहेको बताइएको छ । अन्वेषकहरूका अनुसार अँध्यारो क्षेत्रमा टेलिस्कोपको सहायताले ब्ल्याक होल सजिलै देख्न सकिन्छ । वैज्ञानिकहरुका अनुसार यो ब्ल्याक होल विशेष प्रकारका ताराहरुको खोजीका क्रममा भेटिएको हो ।

प्रमुख अनुसन्धानकर्ता क्रिस्टोफर ओन्केन भन्छन्, ‘वैज्ञानिकहरू ५० वर्षदेखि यस्तो वस्तु पत्ता लगाउने प्रयासमा थिए । अहिलेसम्म वैज्ञानिकहरूले धेरै ब्ल्याक होल पत्ता लगाएका छन्, तर उनीहरूले यो ब्ल्याक होल पत्ता लगाउन सकेनन् ।’

वैज्ञानिकहरुले याे अनुसन्धान ‘एअर एक्सआईभी’ जर्नलमा प्रकाशित गरेका छन् । केही महिनाअगाडि अनुसन्धानकर्ताहरुले ‘मिल्की वे ग्यालेक्सी’ मा स्यागिटेरस ८ ए नामक ‘ब्ल्याक होल’ पत्ता लगाएका थिए । उक्त ‘ब्ल्याक होल’ भन्दा पनि अहिले भेटिएकाे ब्ल्याक हाेल ५०० गुणा ठूलो रहेको बताइएकाे छ ।