काठमाडौं । नेपाली कांग्रेसले विदेशमा रहेका नेपालीहरूलाई मताधिकार दिन माग गरेको छ ।

मताधिकार माग गर्दै आज कांग्रेस महामन्त्रीद्वय गगनकुमार थापा र विश्वप्रकाश शर्मा निर्वाचन आयोग पुगेका छन् ।

उनीहरूले आयोगका पदाधिकारीहरूलाई भेटेर विदेशमा रहेका नेपालीलाई मतदानको अधिकार दिन माग गरेका छन् ।

महामन्त्री शर्माले पत्रकारहरूसँग कुरा गर्दै सोमबार भएको भेटमा प्रधानमन्त्री शेरबहादुर देउवा पनि यसप्रति सकारात्मक देखिएकाले आफूहरू माग गर्दै आयोग आएको बताए ।

‘विदेशमा बस्ने नेपालीले पठाएको नोट चल्ने तर भोट नचल्ने भइरहेको छ । अब यो परिपाटी अन्त्य गरिनुपर्छ,’ उनले भने ।

निर्वाचन आयोग पनि यसप्रति सकारात्मक देखिएको महामन्त्रीद्वयको भनाइ छ ।