काठमाडौं । नेकपा (एकीकृत समाजवादी)ले मन्त्रीपरिषद् हेरफेरका लागि पार्टीले  सिफारिस गरेका नेताहरूलाई तत्काल मन्त्रीमा नियुक्त गर्न प्रधानमन्त्रीलाई दबाब दिएको छ ।

बुधबार बसेको सचिवालय बैठकले आफूले सिफारिस गरेको नेताहरूलाई मन्त्रीमा नियुक्त  गर्न दबाब दिन पार्टी अध्यक्ष माधव नेपाललाई बालुवाटार पठाएको नेता झलनाथ खनालले जानकारी दिए ।

‘मन्त्रिमण्डलमा हाम्रो टिमलाई बदल्ने निर्णय गरेका छौं । त्यो निर्णयलाई सरकारले अहिलेसम्म किन कार्यान्वायन गरेको छैन ?’, सरकारलाई खनालले प्रश्न गरे, ‘सरकारले किन गर्न सकेन ? तुरुन्त कार्यान्वायन गर्नुपर्छ ।’

असार १ मा बसेको सचिवालय बैठकले सरकारमा सहभागी चार मन्त्रीलाई फिर्ता बोलाउने र नयाँ मन्त्रीका लागि पाँच जनाको नाम सिफारिस गरेको थियो । तर सरकारमा सहभागी मन्त्रीहरूको धम्कीका कारण प्रधानमन्त्री शेरबहादुर देउवाले अहिलेसम्म मन्त्रिपरिषद हेरफेर गर्न सकेका छैनन् ।

त्यस्तै बैठकमा पोलिटब्यूरो, केन्द्रीय समिति र केन्द्रीय परिषद बैठकको तयारी सम्बन्धमा छलफल भएको छ ।