काठमाडौं । कानुन न्याय तथा संसदीय मामिलामन्त्री गोविन्द वन्दीले न्यायलयमा विकृति र विसंगतिको सुरुवात न्यायाधीश नियुक्तीबाट हुने बताएका छन् ।

आइतबार राष्ट्रिय सभामा सांसदहरू उठाएको प्रश्नहरूको जवाफ दिँदै मन्त्री वन्दीले न्यायाधीश नियुक्ति गर्दा उसको योग्याता, क्षमता, निष्पक्षता र अहिलेसम्म गरेको कामका आधारमा नियुक्त नगर्दा समस्या आएको जिकिर गरे ।

‘न्यायाधीश नियुक्त गर्दा मेरो र तोरो मान्छे भनेर नियुक्ति गर्यौं । त्यसले गर्दा न्यायायलयमा राजनीतिक नियुक्ति भयो’, उनले भने, ‘पछिल्लो समय न्यायाधीश र कानुन व्यवसायीबीच बार्गेनिङको अडियो सार्वजनिक भएको छ । न्यायपरिषदको सदस्य रामप्रसाद श्रेष्ठको संयोजकत्वमा तीन सदस्य छानबिन टोली गठन भएको छ । त्यसले ४५ दिनमा आफ्नो प्रतिवेदन बुझाउँछ । प्रतिवेदन आएपछि संलग्न सबैलाई कारवाही हुन्छ ।’

मन्त्री वन्दीले न्याय क्षेत्र सुधारका लागि न्यायाधीश हरिकृष्ण कार्कीको समितिले बुझाएको प्रतिवेदन कार्यान्वायनमा ल्याउने प्रतिवद्धता जनाएका छन् ।