काठमाडौं । आर्थिक वर्ष ०७७/७८ मा गृहमन्त्री र गृहसचिवले सुराकी परिचालनका नाममा एक करोड ३८ लाख खर्च गरेका छन् ।

कानूनबिना नै हुँदै आएको यस्तो खर्चमा विगतमा झैं यस वर्ष पनि महालेखापरीक्षकको कार्यालयले प्रश्न उठाएको छ ।

महालेखाको प्रतिवेदनअनुसार, ०७७÷७८ मा गृहमन्त्रीले ६२ लाख ५० हजार र गृहसचिवले ७५ लाख ७५ हजार रूपैयाँ सुराकी सुराकी परिचालनको नाममा बाँडेका हुन् ।

त्यस वर्ष लामो समय रामबहादुर थापा बादल गृहमन्त्री र महेश्वर न्यौपाने गृहसचिव थिए । कानूनविना ०५० सालमा मन्त्रिपरिषद्ले गरेको एक निर्णयका आधारमा गृहमन्त्रीले एकपटकमा ५० हजार र गृहसचिवले २० हजारसम्म खर्च गर्दै आएका छन् । एकपटकको खर्चको सीमा तोकिए पनि महालेखाले निश्चित अवधिको खर्च गर्ने सीमा पनि तोक्न भनेको छ, नयाँ पत्रिका दैनिकमा खबर छ ।