काठमाडौं । फुटबल क्लब बार्सिलोनाका अध्यक्ष जोन लापोर्टाले आफ्ना पूर्वखेलाडी लियोनल मेसीलाई पुनः क्लबमै फर्काउने संकेत गरेका छन् ।

एक दिनअघि अमेरिकाको लस भेगासमा प्रि–सिजनको इएल क्लासिको हेर्न पुगेका लापोर्टाले सञ्चारमाध्यमहरूसँग कुरा गर्दै मेसीजस्ता सुपरस्टार खेलाडीलाई करिअरको अन्तिम सयम बार्सिलोनाबाट खेलेर सन्यास मिलाउनु आफ्नो र क्लबको उत्तरदायित्व रहेको बताए ।

उनै लापोर्टाले ठ्याक्कै एक वर्षअघि पाइरहेको तलबमा ५० प्रतिशत कटौती गरेर भएपनि बार्सिलोनामै बस्छु भनेका थिए । तर, लापोर्टाले त्यो पनि अस्वीकार गर्दै मेसीलाई क्लब छोड्न बाध्य बनाएका थिए ।

मेसीलाई राख्दा क्लबलाई थप आर्थिक भार थपिने भन्दै लापोर्टाले क्लबमा राख्न चाहेका थिएनन् । उनलाई तत्कालीन उपकप्तान सर्जियो बुस्केट्स र वरिष्ठ खेलाडी जेरार्ड पिकेले पनि साथ दिएका थिए ।

अहिले क्लबको आर्थिक स्थिति सुधार भएको हो या लापोर्टाको मन बदलिएको हो त्यो भने बुझ्न बाँकी छ ।

लापोर्टाको यो भनाइले बार्सिलोना मेसीलाई पुनः अनुबन्ध गर्न चाहन्छ भन्ने संकेत भने आएको छ ।

मुख्य प्रशिक्षकमा मेसीका पूर्वसहकर्मी जाभी आएसँगै लार्पोर्टालाई दबाब बढेको बुझ्न पनि सकिन्छ ।

मेसी गत वर्षकाे जुलाईमा २१ वर्ष बिताएको स्पेनिस क्लब क्लब बार्सिलोना छोडेर फ्रेन्च क्लब पेरिस सेन्ट जर्मेन (पिएसजी) गएका थिए ।

इएल क्लासिकोमा रियलमाथि बार्सिलोनाको जित