काठमाडौं । बाबुराम नेतृत्वको नेसपा र वामदेव नेतृत्वको नेकपा एकता राष्ट्रिय अभियानबीच हुने सिट बाँडफाँटबारे छलफल गर्न माओवादी केन्द्रले स्थायी समिति बैठक बोलाएको छ ।

केन्द्रीय कार्यालय पेरिसडाँडामा दिउँसो १ बजे बस्ने बैठकमा बाबुराम र वामदेवले राखेको शर्त, सांगठनिक अवस्था, चुनावी रणनीतिबारे छलफल हुने नेता गिरिराजमणि पोखरेलले जानकारी दिए ।

‘एउटै निर्वाचन चिन्हबाट चुनाव लड्नेसम्बन्धमा पार्टीले निर्णय गरिसकेकाले आजको बैठकमा त्यस विषयमा छलफल होला, पोखरेलले भने, ‘बाबुराम र वामदेवले राखेको शर्तबारे हामीलाई केही थाहा छैन । त्यस विषयमा नेतृत्वले जानकारी बैठकलाई जानकारी गराउनुहुन्छ होला ।’

मंगलबार बसेको बैठकले दुवै दललाई माओवादीको निर्वाचन चिन्ह प्रयोग गर्न दिने निर्णय गरेको थियो । माओवादीको निर्णयण आए लगत्तै भागबण्डाकोबारेमा प्रचण्ड र बाबुरामबीच पेरिसडाँडामा छलफल भएको थियो ।

स्रोतका अनुसार बाबुरामले ५ सिट र वामदेवले २ सिट दावी गरेका छन् । नेसपालाई २ र नेकपा एकता राष्ट्रिय अभियानलाई १ सिट दिन माओवादी तयार भएको छ । सिट बाँडफाँटबारे गठबन्धन दलहरूबीच नै भागबण्डा मिलेको छैन ।