काठमाडौं । मन्त्रालय र महत्वपूर्ण सरकारी कार्यालयहरूमा राष्ट्रपति र प्रधानमन्त्रीको तस्बिर राख्ने गरिन्छ । झनै मन्त्रीको कार्यकक्षमा त अनिवार्यजस्तो हो । तर, प्रदेश १ का स्वास्थमन्त्री जयराम यादवले भने कार्यकक्षबाट राष्ट्रपति र प्रधानमन्त्रीको तस्बिर हटाएका छन् ।

उनले आइतबार आफ्नो कार्यकक्षबाट राष्ट्रपति विद्यादेवी भण्डारी र प्रधानमन्त्री शेरबहादुर देउवाको तस्बिर हटाएका हुन् ।

राष्ट्रपति र प्रधानमन्त्रीको तस्बिर हटाएपछि उनले प्रदेश प्रमुख पर्शुराम खापुङ र मुख्यमन्त्री राजेन्द्रकुमार राईको तस्बिर राखेका छन् ।

संघीयताको पूर्ण कार्यान्वयनका लागि राष्ट्रपति र प्रधानमन्त्रीको तस्बिरर हटाएर प्रदेश प्रमुख र मुख्यमन्त्रीको राखेको मन्त्री यादवको भनाइ छ ।

‘संघीय लोकतान्त्रिक गणतन्त्र नेपाल– जिन्दावाद । राष्ट्रपति र प्रधानमन्त्रीको फोटो हटाएर प्रदेश प्रमुख पर्शुराम खापुङ र मुख्यमन्त्री राजेन्द्रकुमार राईको तबिर आइतबारदेखि स्वास्थ्य मन्त्रालयमा स्थापित गरियो,’ उनले सामाजिक सञ्जालमा लेखेका छन् ।

यादव जसपाको प्रदेशसभा सदस्य हुँदै मन्त्री भएका हुन् ।