काठमाडौं । २३ असोजमा उम्मेदवारी मनोनयनसँगै देशमा चुनावी माहोल तातिएको छ । यसैबीच चुनावी प्रचारका क्रममा काठमाडौं ५ का उम्मेदवारद्वय एमालेका ईश्वर पोखरेल र कांग्रेसका प्रदीप पौडेलबीच जम्काभेट भएको छ ।

किरियापुत्रीलाई भेट्न जाने क्रममा दुई मुख्य प्रतिस्पर्धीबीच मंगलबार बिहान बुढानिलकण्ठमा जम्काभेट भएको हो । कांग्रेस बूढानिलकण्ठ ४ का कार्यसमिति सदस्य पवन कार्की भतिजाको किरियापुत्री बस्दा दुवै नेताहरू भेटका लागि पुगेका थिए । यसै भेटमा दुईबीच भेटघाट भएको नेता प्रदीप पौडेल निकट कार्यकर्ताले जानकारी दिए ।

भेटमा पौडेलले मित्रवत प्रतिस्पर्धा गरेर जान प्रस्ताव गरेका थिए । तर पोखरेलले कुनै प्रतिक्रिया दिएनन् ।

‘पोखरेलसँगको भेटमा प्रदीप दाइले ४ मंसिरको चुनावमा मित्रवत प्रतिस्पर्धा गरेर जाउँ भन्नुभयो । तर पोखरेलले कुनै प्रतिक्रिया दिनुभएन । उहाँले हात मिलाउनुभयो अनि हाँसेर टार्नुभयो ।’ पौडेल निकटका ती नेताले भने ।

पौडेलले सोमबारबाट चुनावी घरदैलो अभियान सुरु गरेका छन् । पौडेल २०७४ सालमा तनहुँको प्रदेशसभामा उठेर थोरै मतले पराजित हुन पुगेका थिए ।

काठमाडौं ५ बाट २०७४ सालमा पोखरेल विजयी भएका थिए । उनले कांग्रेसका डा. प्रकाशशरण महतलाई पराजित गरेका थिए ।

अघिल्लोपटक एमाले र माओवादी मिलेका थिए । यसपटक माओवादी कांग्रेसको कित्तामा छ । अघिल्लोपटक पराजित भएका महत यसपटक समानुपातिकमा बसेका छन् ।

काठमाडौं ५ मा पोखरेल र पौडलबाहेक स्वतन्त्रकी रञ्जु दर्शनाले पनि उम्मेदवारी दिएकी छिन् ।