काठमाडौं । निर्वाचन आयोगले प्रतिनिधिसभा र प्रदेशसभा सदस्यका लागि समानुपातिक उम्मेदवारको बन्दसूचीमा कम्तीमा ३८५ जनालाई हटाउने भएको छ ।

स्थानीय तह निर्वाचनमा उम्मेदवार शनिबारसम्म निर्वाचन खर्च नबुझाउनेको नाम आयोगले सूचीबाट हटाउन लागेको हो ।

प्रदेश र प्रतिनिधिसभाको समानुपातिक सूचीमा समेटिएकामध्ये ४३९ जनाले निर्वाचन खर्च विवरण बुझाएका थिएनन् । यस्ता उम्मेदवारलाई जरिवाना बुझाउने समय शनिबारसम्म दिइएको थियो । आयोगका अनुसार, निर्देशनबमोजिम जरिवाना बुझाउनेको संख्या ५४ मात्रै छ ।

आयोगले स्थानीय तह निर्वाचनमा उम्मेदवार बनेर खर्च विवरण नबुझाउने १ लाख २३ हजार व्यक्तिलाई जरिवाना तोकेको छ । उनीहरूलाई ५० हजारदेखि ७ लाख रूपैयाँसम्म जरिवाना गरिएको छ । जरिवानामा पर्नेहरूमा काठमाडौं महानगरपालिकाका प्रमुख (मेयर) बालेन्द्र शाहदेखि धरानका मेयक हर्कराज राईसम्म छन् ।