काठमाडौं । पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ की पत्नी सीता दाहालको स्वास्थ्य अवस्था जुटिल बनेको छ ।

केही समयअघिमात्र १५ दिन अस्पताल बसेर डिस्चार्ज भएकी दाहालको स्वास्थ्यमा पुनः समस्या देखिएपछि उनलाई शनिबार ललितपुरको मेडिसिटी अस्पताल भर्ना गरिएको थियो ।

अहिले भेन्टिलेटरमा राखेर दाहालको उपचार भइरहेको प्रचण्डका सचिवालयले जानकारी दिएका छन् । उनको स्वास्थ्यस्थिति बुझ्नको लागि छोरीहरू रेनु, गंगा, प्रचण्डका स्वकीय सचिव रमेश मल्ल लगायत अस्पताल गएका छन् ।

प्रचण्डको सचिवालयको अनुसार दाहालको अवस्था निकै जटिल छ । उनको अक्सिजन लेबल निकै कम रहेको छ । खाना खान समस्या भएपछि स्लाइनको माध्यमबाट दिएको छ । लामो समयदेखि चिकित्सकको निगरानीमा रहेका दाहालको अवस्था दिनप्रतिदिन खस्किँदै गइरहेको थियो ।

सीता लामो समयदेखि पार्किन्सन जस्तो देखिने एक जटिल प्रकारको रोगबाट पीडित छिन् । दाहालको उपचारका अमेरिका, सिंगापुर, थाइल्याण्ड, भारत लगिएपनि रोगमा कुनै सुधार नआएपछि उनलाई घरमै चिकित्सकको निगरानीमा राखिएकाे थियाे ।

२०७४ मंसिरमा एक मात्र छोरा प्रकाशको मृत्युभएपछि सीता विछिप्त भएकी थिइन् । प्रचण्ड चुनावी सभाका लागि आफ्नै निर्वाचन क्षेत्र गोरखामा रहेका छन् ।