काठमाडौं । इन्डोनेसियामा जारी जी २० बैठकको आज अन्तिम दिन हो। यही बैठक चलिरहँदा जी ७ देशका नेताहरू पोल्याण्डमा खसेको रुसी मिसाइलबारे छलफल गर्न बैठकमा जुटेका छन् ।

बिबिसीले जी २० को बैठक जारी रहँदा जी ७ सम्बद्ध अमेरिका, इटाली, जर्मन, फ्रान्स, बेलायत, जापान, स्पेन र नेदरल्याण्डका जनेताहरूको बैठक बसेको लेखेको छ ।

समाचार अनुसार बैठकमा युरोपेली परिषद्का अध्यक्ष चार्ल्स मिशेल र युरोपियन युनियनका आयुक्त पनि सहभागी छन् ।।

पोल्याण्ड नेटो सैन्य गठबन्धनको एक सदस्य राष्ट्र हो । नेटो सम्बद्ध राष्ट्रमाथि गरिने आक्रमणलाई नेटोमाथिकै आक्रमणका रूपमा लिने गरिएको छ ।

यो हमलापछि सबैको नजर पोल्याण्डमा नेटो सेना आउने हो कि होइन भन्नेमा परेको छ ।

बीबीसी संवाददाता क्रिस मेसनका अनुसार पोल्याण्डमा भएको घटनापछि जी–२० का सबै देशका योजनाहरु ध्वस्त भएको देखिन्छ ।

पश्चिमी देशका नेताहरू आफ्ना रक्षा र परराष्ट्रमन्त्रीहरूसँग कुराकानी गर्न र पोल्याण्डसँग सम्पर्क गर्न व्यस्त छन् ।

अमेरिकी राष्ट्रपति जो बाइडेन र बेलायतका प्रधानमन्त्री ऋषि सुनक पोल्याण्डसँग संवादमा जुटेका छन् ।

बिबिसीका अनुसार, बाइडेनले नेटो प्रमुख जेन्स स्टोल्टनबर्गसँग पनि वार्ता गरेका छन्।