काठमाडौं । नुवाकोट क्षेत्र नम्बर २ मा नेपाली कांग्रेसका उम्मेदवार अर्जुननरसिंह केसीले आफ्नो अग्रता यथावत राख्दै प्रतिस्पर्धीलाई पछि पार्दै लगेका छन् । दोस्रो स्थानमा रहेको राष्ट्रिय स्वतन्त्र पार्टी भने त्यसलाई जोगाउन नसकेर तेस्रोमा झरेको छ ।

मतगणनाको सुरुदेखि नै अगाडि लागेका केसीले एमाले उम्मेदवार नारायणप्रसाद खतिवडालाई ७ हजार ९९४ मतान्तरले पछाडि पारेका हुन् ।

केसीले १९ हजार नौ सय ९७ मत हासिल गर्दा खतिवडा १२ हजार तीन मतका साथ निकै पछिबाट पछ्याइरहेका छन् ।

यसअघि सार्वजनिक मत परिणाममा राष्ट्रिय स्वतन्त्र पार्टी दोस्रो स्थानमा थियो । मतगणना अघि बढ्दै गर्दा यो दललाई भने एमालेले उछिनेको छ । राष्ट्रिय स्वतन्त्र पार्टीका सुमनविक्रम पाण्डेले ११ हजार तीन सय ८७ मतका साथ खतिवडालाई पछ्याइरहेका छन् ।