काठमाडौं । मंसिर ४ मा सम्पन्न प्रदेश तथा प्रतिनिधिसभा निर्वाचनमा पार्टीका उम्मेदवार जिताउन नसकेपछि माओवादी केन्द्रको ललितपुर जिल्ला कमिटी संयोजक र सचिवले राजीनामा दिएका छन् ।

ललितपुर जिल्ला संयोजक शिवप्रसाद कट्टेल र सचिव दीपक पुलामीले पार्टीका उम्मेदवारको पराजयमा नैतिक जिम्मेवारी लिँदै पदबाट अलग हुने निर्णय गरेका हुन् ।

हालै सम्पन्न निर्वाचनमा ललितपुर क्षेत्र नं. ३ मा माओवादी केन्द्रबाट ऊर्जामन्त्री पम्फा भुसाल प्रतिस्पर्धामा उत्रिएकोमा पराजित भएकी थिइन् । राष्ट्रिय स्वतन्त्र पार्टीकी डा. तोसिमा कार्कीले जित हासिल गर्दा भुसाल निकटतम प्रतिस्पर्धीसम्म हुन सकिनन् ।

त्यस्तै क्षेत्र नं. ३ प्रदेश सभा १ बाट माओवादी केन्द्रकै राजकाजी महर्जन उम्मेदवार बनेकोमा उनी पनि पराजित भए ।

यसैगरी ललितपुर क्षेत्र नम्बर २ को प्रदेश सभा १ मा माओवादी केन्द्रका उम्मेदवार हरि दाहालले पनि हार व्यहोरेका थिए ।

स्रोतका अनुसार कट्टेल र पुलामीले आफ्नो जिल्लामा भएको पार्टीको हारको जिम्मेवारी लिँदै बागमती प्रदेश कार्यालयमा राजीनामा बुझाएका छन् ।

राजीनामा दिने कट्टेल माओवादीका जनयुद्धकालीन नेता हुन् । उनी गत स्थानीय तह निर्वाचनमा महालक्ष्मी नगरपालिकाको मेयर उम्मेदवार बनेकोमा पराजित भएका थिए ।