काठमाडाैं । महोत्तरीको रामगोलापुर ५ मा स्थानीय र प्रहरीबीच झडप भएको छ । आन्दोलनमा ढुंगामुढा गर्न थालेपछि प्रहरीले आन्दोलनलाई नियन्त्रणमा लिन ५ राउन्ड अश्रुग्याँस प्रहार गरेको प्रहरीले जनाएको छ ।

घरेलु हिंसा मुद्दामा जिल्ला अदालत महोत्तरीले संरक्षणात्मक आदेश जारी गरेपछि माइतबाट घर फकिएकी नेहा चौधरीले घरमा प्रवेश नपाएको विषयलाई लिएर आन्दोलन सुरु भएको थियो ।

घरमा प्रवेश नपाएपछि नेहा आफ्ना श्रीमान् डा.पंकज चौधरीको घरको गेटमै धर्ना बस्दै आएकी थिइन । मंसिर २६ गते अदालतले संरक्षणात्मक आदेश जारी गरेपछि नेहाले पंकजको घरमा बस्न पाउनु पर्ने माग राख्दै धर्ना दिदैँ  आएकी छन् ।

डा.पंकज चौधरीलाई नियन्त्रणमा लिएर थप अनुसन्धान गरिरहेको बेला आन्दोलन चर्काएको भन्दै प्रहरीले नेहा चौधरी र नेहारिका राजपुतलाई समेत अहिले नियन्त्रणमा लिएर आन्दोलन मत्थर बनाउने प्रयास गरिहेको छ ।