काठमाडौं । नुवाकोटस्थित पञ्चकन्या गाउँपालिका वडा नं २ की वडा सचिव सरिता राउतसहित तीनजनालाई अख्तियार दुरुपयोग अनुसन्धान आयोगले मुद्दा दायर गरेको छ ।

राउतसहित कार्यालय सहायक रामकुमार गिरी र सहयोगी नीलप्रसाद मिश्रले सरकारको सम्पत्ति बदनियतपूर्ण रुपमा हानी नोकसानी गरेको आरोप छ । उनीहरूलाई ५३ लाख एक हजार आठ सय ५६ रूपैयाँ बिगो माग दाबी गर्दै आज आयोगले विशेष अदालतमा मुद्दा दायर गरेको हो ।

सामाजिक सुरक्षा भत्ता वितरण गर्न भनी ल्याएको रकम र विभिन्न शीर्षकमा उठेको राजस्व रकम शंकास्पद रूपमा हराएकोबारे आयोगमा उजुरी परेको थियो । यसबारे अनुसन्धान हुँदा वडासचिव राउत र कार्यालय सहायक गिरी र अर्का सहयोगी मिश्रको रहोवरमा उक्त रकम राखिएको भेटियो ।

अनुसन्धानमा खुलेअनुसार रकम राखिएको दराजका सेफको चाँबी सरिता राउत र रामकुमार गिरीसँग थियो । त्यस्तै, ढोकाको चाँबी भने नीलप्रसाद मिश्रले बोकेका थिए । रकम गायब भएपछि पनि चाँबी लगाएको ठाउँमा कतै पनि तोडफोड भएको पाइएन ।

रकम हराउँदासमेत उनीहरूले प्रहरीसँग समन्वय गर्न जरुरी ठानेनन् । अनुसन्धानको त्रममा उनीहरूले उक्त रकम वडा कार्यालयमै राखर घर गएको देखिएको हुँदा तीनैजनालाई आज भ्रष्टाचारको मुद्दा दायर गरिएको आयोगले जनाएको छ ।

प्रकाशित मिति: शुक्रबार, माघ १४, २०७८, १६:११:००