काठमाडौं । मानिसले कतिबेला कुन निर्णय लिन्छन् कोही भन्न सक्दैन । एकैछिनअघि शान्त देखिने मान्छेले केही बेरमै भयानक निर्णय पनि लिनसक्छन् । अमेरिकामा एक मोडलले यस्तै गरेकी छिन् ।

अमेरिकाको म्यानहट्टनमा मिस यूएसएसमेत रहेकी चेल्सी क्रिस्टले सबैलाई शुभदिनको कामना गर्दै इन्स्टामा स्टाटस पोस्ट गरेको आधा घण्टामै आत्महत्या गरेकी छिन् । उनले सोमबार एक घरको ६० औं तलाबाट हाम फालेर आत्महत्या गरेकी हुन् ।

अहिले ३० वर्षकी रहेकी मोडल चेल्सीले सोमबार बिहान साढे सात बजे आत्महत्या गरेकी हुन् । डेलीमेलमा प्रकाशित एक खबर अनुसार मिस यूएसए रहिसकेकी चेल्सी एक्सट्रा नामको एक इन्टरटेनमेन्ट शोकी संवाददातासमेत थिइन् ।

उनले आत्महत्या गर्नुको कारण भने अहिलेसम्म खुलेको छैन । हाम फाल्नुअघि उनले इन्स्टाग्राममा एक पोस्टमा लेखेकी थिइन्, ‘यो दिनले तपाईं सबैको लागि आराम र शान्ति ल्याओस् ।’

म्यानहट्टन प्रहरी उनको आत्महत्या सम्बन्धमा छानबिन गरिरहेको छ । उनी सोहि घरको नवौं तलामा बस्ने गर्थिइन् ।