काठमाडौं । सामुखुसीमा रहेको एक म्यानपावर कम्पनीमा पीडितसहित पुगेका युट्युबरमाथि कुटपिट भएको छ । मंगलबार दिउँसो टोखा नगरपालिका–१४ मा रहेको ट्रिपल स्टार इम्प्लोइमेन्ट प्रालिमा उक्त कम्पनीबाट पीडित भएकासहित युट्युबर पुगेका थिए ।

कुटपिटमा तीन जना घाइते भएका छन् । उक्त कुटपिटको दृश्य पनि अहिले भाइरल बनिरहेको छ । कुटपिटमा घाइते भएकाहरूको ग्रीनसिटी अस्पतालमा उपचार भइरहेको प्रहरीले जानकारी दिएको छ । महानगरीय प्रहरी वरिष्ठ उपरीक्षक सुदीप गिरीका अनुसार घाइतेको अवस्था अहिले सामान्य रहेको छ ।

क्यामेरासहित म्यानपावरमा पुगेका पीडित र युट्युबरमाथि कुटपिट भएको गिरीले बताए । बाहिरिएको भिडियोमा एकजनामाथि कुटपिट गरी टाउको फुटाइएको छ । लखेटेर पनि कुटपिट गरिएको भिडियोमा देख्न सकिन्छ । प्रहरीले भने घटनाको छानबिन गरिरहेको बताएको छ ।