काठमाडौं । आफ्नै घर पछाडी रहेको शौचालयमा शौच गर्न जाँदा बालिकालाई जबरजस्ती करणी गरी फरार तीनजना पुरुषको बचाउमा वडाअध्यक्ष नै लागि परेका छन् ।

महोत्तरीस्थित बर्दिवास नगरपालिका ६ का स्थानीय सुनिल कुमार महतो(१६), दिनकर महतो(१७) र अविरन महतो (१९)ले ती १४ वर्षिया बालिकालाई जबरजस्ती करणी गरेका थिए । उक्त घटना पछि अहिले ती तीनैजना किशोर फरार छन् ।

फरार किशोरहरूको ढाकछोपमा वडाअध्यक्ष नै लागिपरेपछि सुरक्षा निकायलाई अहिले यो विषय टाउको दुखाई बनेको छ । सो वडाका वडाअध्यक्ष पदम बहादुर आले नै उनीहरूको बचाउमा लागेको गुनासो स्थानीय स्तरबाट बढ्न थालेको छ ।

यतिबेला वडाअध्यक्षसहित माओवादी केन्द्र पक्षका स्थानीय नेता तथा कार्यकर्ता सुर्जनाथ महतो, लालदास महतो, अशोक महतो लगायतका दबाबमा अनुसन्धानसमेत अघि बढ्न सकेको छैन ।

सुरक्षा निकायले जनाएअनुसार उनीहरूको दबाबमा प्रहरीले अहिलेसम्म बालिकाको स्वास्थ्य परिक्षण लगायतका अनुसन्धान प्रक्रिया अघि नबढाइ ढाकछोप गरिरहेको पीडित पक्षको गुनासो छ । तीन किशोर बालिकामाथि जबरजस्ती करणी गरेर माघ २८ देखि नै फरार छन् ।