काठमाडौं । १९४ रनको लक्ष्य तर १४४ रन बनाउँदा ९ विकेट पतन भइसकेको दयनीय अवस्थामा नेपाली टिम थियो । जितले एकदिवसीय मान्यता दिलाउने महत्वपूर्ण क्षणकाे खुशी नेपालको नवौं विकेट गुमेपछि क्यानडाले मनाउन सुरू गरिसकेको थियो । क्रिजमा करण केसी र सन्दीप लामिछाने थिए ।

यस्तोमा नेपालको जितको आशा लगभग मरिसकेको थियो । हुन पनि अन्तिम एक विकेट बाँकी हुँदा चुनौतीपूर्ण लक्ष्य भेटेर जित निकाल्नु सहज विषय थिएन । तर २०१८ फेब्रुअरी १४ मा लिग २ को नतिजा अर्कै आउँदा नेपालले क्यानडालाई स्तब्ध बनाएर एक विकेटको रोमाञ्चक र दुर्लभ जित दिलाएको थियो ।

लगभग जित्ने आशा मरिसकेको स्थितिबाट उठ्दै नेपालका लागि करणले ३१ बलमा ४२ रन र सन्दीपले १८ बलमा ५ रन बनाउँदै टिमको जित सम्भव बनाएपछि खेलको निक्कै तारिफ भएको थियो । ४२ रन बनाउने क्रममा करणले तीन चौका र चार छक्का प्रहार गरेका थिए । सो महत्वपूर्ण खेलको अन्तिम ओभरसम्म पनि खेल कता पल्टिन्छ टुंगो थिएन ।

अन्तिम ओभरमा क्रिजमा करण केसी थिए । नेपाललाई जितको लागि ८ रन चाहिएको थियो । क्यानडालाई ४३ ओभरदेखि मात्रै एक विकेटको खाँचो थियो । तर सन्दीपले सम्हालिएर केसीलाई साथ दिएपछि नेपाल जितनजिक पुगेको थियो ।

अन्तिम ओभरमा ८ रन चाहिँदा केसीले सुरूका चार बलमा कुनै रन प्रहार गर्न सकेनन् । जसका कारण फेरि क्यानडाका बलरले जितनजिक पुगेको शैलीमा सेलिब्रेसन सुरुवात गरिसकेका थिए ।

तर पाँचौ बलमा क्यानडाका बलर परवेजलाई केसीले छक्का प्रहार गर्दै टिमलाई जितनजिक पुर्याए । अन्तिम बलमा नेपाललाई जितका लागि २ रन चाहिएको थियो । तर क्यानडाका बलरले वाइड फ्याक्दै एक रन र बल अतिरिक्त दिंदा खेल बराबरी भयो । त्यही अतिरिक्त बलमा करणले एक रन प्रहार गर्दै टिमलाई विश्वकप क्वालिफायरमा लगेका थिए । सोही जितले नेपालले एकदिवसीय क्रिकेटको मान्यता पाएको थियो । जित नजिकै अझै मुखैमा आएको ठूलो अवसर नेपाली टिमले खोसिदिंदा क्यानडा स्तब्ध बनेको थियो ।

फेरि आमनेसामने

फेरि दुई वर्षपछि अर्को निर्णायक खेलमा क्यानडाले नेपाल नै प्रतिद्वन्द्वी पाएको छ । तर त्यतिखेर जित दिलाएका करण घाइते भएका कारण टिममा छैनन् । सन्दीप टिमको कप्तान छन् । ओमानमा भइरहेको टी २० विश्वकप क्वालिफायरमा नेपाल र क्यानडा आज भिड्न लागेका हुन् । समूहमा नेपाल दुई जितपछि चार अंकसहित पहिलो स्थानमा छ । दुई टिम सेमिफाइनमा जाने यो समूहको समीकरणमा खेल अघिसम्म नेपाल बलियो अवस्थामा छ । तर क्यानडालाई नेपाल तगारो बनेर उभिएको छ । क्यानडाको दुई खेलपछि २ अंक छ । फिलिपिन्सलाई जिते पनि ओमानसँग ९ विकेटको फराकिलो अन्तरले पराजित भएपछि क्यानडा दबाबमा आएको हो ।

सेमिफाइनलमा स्थान बनाउन क्यानडाले नेपालविरुद्ध सामान्य जितमात्रै निकालेर पुग्ने छैन । क्यानडाले नेपालविरुद्ध ३७ रन बढीले वा १६ ओभरभित्र नेपालले दिएको लक्ष्य पूरा गर्नुपर्नेछ ।

क्यानडाले नेपाललाई निक्कै फराकिलो अन्तरले पराजित गर्ने र ओमानले पनि कमजोर फिलिपिन्सलाई फराकिलाे अन्तरले पराजित गरे मात्रै नेपाल बाहिरिनेछ । तर रनरेटमा बलियो रहेको नेपाललाई अहिले औसत रहेको क्यानडाले फराकिलो अन्तरमा पराजित गर्ने सम्भावना निक्कै कम देखिन्छ ।

नेपाल र क्यानडा तथा ओमान र फिलिपिन्सबीचको खेल आज दिउसो पौने चार बजे एकैपटक हुनेछ ।

नेपालले पहिलो खेलमा ओमानलाई ३९ रन र दोस्रो खेलमा फिलिपिन्सलाई १३६ रनको फराकिलो अन्तरले पराजित गरेको थियो । क्यानडाको नागरिक भइसकेका दासानायके फेरि नेपाली टिमको प्रशिक्षक भएर आएका छन् । जुन उनले प्रशिक्षण गरेको देशविरुद्ध फेरि नेपाली टिम उतार्दैछन् ।

नेपाल सेमिफाइनमा पुगे अर्को समूहबाट आउन सक्ने युएई, आयरल्याण्ड वा बहराइनसँग खेल्नेछ ।