काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डले वरिष्ठ गायक लोक गायक तथा अभिनेता जयनन्द लामाको निधनप्रति दुःख व्यक्त गरेको छन् । उनले आज सामाजिक सञ्जालमार्फत दुःख व्यक्त गरेका हुन् ।

अध्यक्ष प्रचण्डले लामाले गाएका ‘कल्कत्ते काइँयो’, ‘चुइँ चुइँ चुइँकने जुत्ता’, ‘के को साँचो’ जस्ता गीतलाई सम्झादै यी सदा आफ्ना ओठमा बसिरहने बताएका छन् ।

‘आफ्नो उत्कृष्ट कला पस्केर नेपाली स्रोता अनि दर्शकलाई मनोरञ्जन प्रदान गर्नुहुने चर्चित गायक एवं चरित्र अभिनेता जयनन्द लामाको निधनको खबरले दुःखी छु’, उनले फेसबुकमा लेखेका छन्, ‘लोकप्रिय कलाकार लामा भौतिक रुपमा हामी माझ नरहेता पनि कल्कत्ते काइँयो, चुइँ चुइँ चुइँकने जुत्ता, के को साँचोजस्ता उहाँका अनगिन्ति सिर्जना हाम्रा ओठमा सदैव बसिरहनेछन् । हामी सम्झिरहनेछौं । कलाकार जयनन्द लामाप्रति भावपूर्ण श्रद्धाञ्जलि !’

प्रचण्डले लामासँगको तस्बिरसमेत सामाजिक सञ्जालमा राखेका छन् ।

कलाकार लामाको आज बिहान निधन भएको हो । उनी घरको गेटमा मृत अवस्थामा भेटिएको बताइएको छ ।

लामा सिन्धुपाल्चोक बाह्रबीसेका हुन् । उनले दर्जनौं लोकगीतमा स्वर दिनुका साथै चलचित्र र टेलिश्रृंखलामा अभियान गरेका थिए ।

पछिल्लो समय उनी ‘हल्का रमाइलो’ नामक टेलिश्रृंखलामा देखिँदै आएका थिए ।