काठमाडौं । सुरु हुनै लागेको संसद बैठक स्थगित गरेपछि प्रधानमन्त्री शेरबहादुर देउवाले एमालेका नेतासँग छलफल गरेका छन् ।

बानेश्वरस्थित संसद भवन परिसरमा नै देउवाले एमाले अध्यक्ष केपी ओली, ईशवर पोखरेल र सुवास नेम्वासहितका नेतासँग संवाद गरेका हुन् ।
कांग्रेसबाट ज्ञानेन्द्रबहादुर कार्की र नेता गगन थापा सहभागी भएका हुन् । सत्तारूढ दलमा किचलो बढेपछि प्रधानमन्त्रीले एमालेको सहयोग लिएर एमसिसी पास गराउने तयारी गरेका छन् ।

यसका लागि उनले यस अघि पनि ओलीसँग संवाद गरिसकेका छन् । देउवाले ओलीसँग भेटेको एक हप्तामा यो तेस्रोपटक हो । संसद भवन परिसरमा रहेको एमाले संसदीय दलका नेता केपी ओलीको कार्यकक्षमा देउवा र एमालेका नेताबीच छलफल भएको हो ।

तर एमालेले सभामुखलाई फिर्ता बोलाउनुपर्ने र नेकपा एसका १४ सांसदमाथि कारवाही गर्नुपर्ने शर्त राख्दै आएको छ । सत्ता गठबन्धन टुटाउने शर्तमा एमाले एमसिसी पास गर्न तयार रहेको बुझिएको छ ।