काठमाडौं । अमेरिकी सहयोग परियोजना (एमसिसी) बारे छलफल गर्न आज प्रतिनिधिसभाको बैठक बस्दै छ ।

बैठक दिउँसो १ बजेका लागि तय छ ।

प्रतिनिधिसभामा एमसिसी प्रस्तावमाथि यसअघि नै छलफल गर्नुपर्ने कार्यसूची थियो । तर सत्ता गठबन्धनका दलबीचको मतान्तरले छलफल हुन सकेन । अब भने एमसिसीबारे छलफल हुने संकेत देखिएको छ । स्रोतका अनुसार सत्ता गठबन्धन दलबीच एमसिसीका प्रश्न उठेका विषयमा ‘व्याख्यात्मक घोषणा’को पूरक प्रस्ताव पारितसहित अनुमोदन गर्ने सहमति बनेको छ ।

तथापि, नयाँ सहमतिबारे दलहरूले सार्वजनिक रूपमा केही बताइसकेका छैनन् ।

नेपाली कांग्रेस यथास्थितिमा एमसिसी पास गर्नुपर्ने पक्षमा अडिग रहँदै आएको भए पनि माओवादी केन्द्र र एकीकृत समाजवादी विपरीत धारमा उभिएका थिए ।  कांग्रेसले एमालेसँग संवाद बढाएपछि सत्ता गठबन्धन नै धरापमा परेका बेला एमसिसीमा ब्रेक थ्रु भएको हो ।