काठमाडौं । रुसले युक्रेनमाथिको आक्रमणलाई थप विस्तार गर्दै तीव्र पारेको छ । अघिल्ला दिनहरूमा सीमित शहर र स्थानमा आक्रमण गरेको रुसले आइतबार सबै दिशाबाट हमला गरिरहेको छ ।

युक्रेनको सशस्त्र फौजका प्रमुखले फेसबुकमार्फत आइतबार कठिन समय भएको लेखेका छन् । उनका अनुसार, रुसी फौजले लगभग सबै दिशाबाट आक्रमण जारी राखेको छ ।

रुसी सेनाले खार्किभमाथि निरन्तर आक्रमण गरिरहेको छ । तथापि, युक्रेनी सेनाले त्यहाँ आफ्नो नियन्त्रण कायम गरेको दाबी गरेको छ ।

रुसले बिहीबारदेखि युक्रेनमाथि लगातार आक्रमण गरिरहेको छ । त्यसयता उसका ४ हजार ३०० सेना मारिएको युक्रेनी दाबी छ । तथापि यसको आधिकारिक पुष्टि भने हुन सकेको छैन ।

युक्रेनमाथि रुसले आक्रमण जारी राखेपछि अमेरिका, जर्मनीलगायत मुलुकले हातहतियारलगायत सहयोग गरिरहेका छन् । युरोपेली सङ्घ (इयू)ले रुसी अतिक्रमणसँगै युक्रेनलाई अस्त्रहरू पठाउने अभूतपूर्ण कदम चालिरहेको छ।