काठमाडौं । फेरि पेट्रोलियम पदार्थको मूल्य वृद्धि भएर आएको छ । नेपाल आयल निगमले आज एक विज्ञप्ति जारी गर्दै इन्डियन आयल कर्पेरेशन (आईओसी) बाट मूल्य बढेर आएको जानकारी दिएको हो ।

आईओसीले पेट्रोलियम पदार्थको मूल्य बढाएर पठाएसँगै नेपालमा पनि फेरी मूल्य बढ्ने देखिन्छ । मूल्य बढेर आएको भए पनि आयल निगमले भने बढाइसकेको छैन ।

नयाँ मूल्य अनुसार पेट्रोलमा ३ रूपैयाँ ८९ पैसा, डिजेलमा ३ रूपैयाँ ८ पैसा र मट्टितेलमा ३ रूपैयाँ ८९ पैसाले बढेर आएको छ । त्यस्तै हवाइ इन्धन ३ रूपैयाँ ३२ पैसा र एलपी ग्याँस प्रति सिलिण्डर ९९.१७ रूपैयाँ बढेर आएको छ ।

रुस-युक्रेन युद्धका कारण अन्तर्राष्ट्रिय बजारमा पेट्रोलियम पदार्थको मूल्य थप वृद्धि भएर उच्चतम विन्दुमा पुगेको निगमले जनाएको छ । नयाँ मूल्य अनुसार निगम १५ दिनमा ३ अर्ब ९ करोड रुपैयाँ नोक्सानीमा जाने निगमले जनाएको छ।

निगमले चालु आर्थिक वर्षको हालसम्मको अवधिमा करिब २८ अर्ब रुपैयाँ नोक्सानी व्यहोरेको जनाएको छ।