काठमाडौं । नेपालले पपुवा न्युगिनीसँग दुई एक दिवसीय क्रिकेट खेल खेल्ने भएको छ । नेपाल क्रिकेट संघ क्यानले आइतबार पपुवा न्युगिनीविरुद्धको दुई एकदिवसीय र त्रिदेशीय टी २० सिरिज हुने जनाएकाे हाे ।

नेपालले काठमाडौं कीर्तिपुरस्थित टियुको मैदानमा पपुवा न्युगिनीसँग ११ र १२ चैतमा दुईवटा एक दिवसीय खेल खेल्नेछ ।

त्यसपछि नेपालले मलेसिया र पपुवा न्युगिनी सहभागी हुने टी २० सिरिज खेल्नेछ । यो सिरिज पनि १४ देखि २१ चैतसम्म टियुकै मैदानमा हुनेछ । यसको कार्यतालिका भने सार्वजनिक भइसकेको छैन ।

नेपाली टिम यतिखेर भने युएईसँग विश्वकप लिग २ का खेल खेल्नु अघि श्रीलंकामा अभ्यास खेल खेलिरहेको छ । यो लिग दुई हप्तापछि दुबईमा हुँदैछ । यो त्रिकोणात्मक लिगमा नेपाल, युएई र पपुवा न्युगिनी खेल्दैछन् । यो सिरिज चैत २ देखि ८ सम्म हुनेछ । याे एक दिवसीय क्रिकेटकाे छनाेट खेलसमेत हाे ।