काठमाडाैं । भारतको पञ्जाब राज्यमा आम आद्मी पार्टीले बहुमतका साथ सरकार बनाउने निश्चित भएको छ । बिहीबार अपरान्ह्सम्म ४४ सिटमा विजयी भइसकेको छ भने ४८ सिटमा आम आद्मीले अग्रता लिएको छ । पञ्जाबको विधानसभामा १ सय १७ सिट रहेको छ ।

लगातार तेस्रो पटकसम्म दिल्लीको मुख्यमन्त्री बनेका अरविन्द केजरीवालले आम आद्मी पार्टी सन् २०१२ मा गठन गरेका थिए । भ्रष्टाचारविरुद्ध अन्ना हजारेले गरेको आन्दोलनका कार्यकर्ता केजरीवालको पार्टीले पञ्जाबमा भारी समर्थन पाएको छ । पार्टी गठन गरेको १० वर्षमा दिल्लीपछि पञ्जाबलाई आफ्नो पकडमा लिन केजरीवाल सफल भएका छन् ।

पञ्जाबमा आम आदमीले आफ्ना पुराना नेता भगवन्त मानलाई मुख्यमन्त्रीको उम्मेदवार बनाएर निर्वाचन लडेका थिए । भगवन्त मानलाई एक कमेडियन तथा राजनेताका रुपमा चिनिन्छ ।

पञ्जाबका मुख्यमन्त्री चरणजीत सिंह चन्नीले ट्विट गरेर कांग्रेसको हार स्वीकार्दै आम आदमी पार्टीलाई बधाई दिएका छन् । यसभन्दा अघि पञ्जाब कांग्रेस प्रमुख नवजोत सिंह सिद्धूले पनि आम आदमीलाई बधाई दिएका थिए ।