काठमाडौं । नेकपा (माओवादी केन्द्र) का अध्यक्ष प्रचण्डले माओवादी जनयुद्धका लडाकुबारे प्रकाश सपुतले बनाएको गीत आफूले कार्यव्यस्तताका कारण सुन्न नपाएको बताएका छन् । साथै उनले यसलाई लिएर धेरै आवेगमा आउन आवश्यक नभएको प्रतिक्रिया दिए  ।

सपुतले लडाकुको अपमान गरेको भन्दै माओवादी वृत्तबाट गीत हटाउन चेतावनी आइरहेका बेला सो पार्टीका अध्यक्षबाट यस्तो प्रतिक्रिया आएको हो ।

‘आफ्नो अनुभव, अनुभूति अनुसार मानिसले गीत–कविता सिर्जना गर्छन् । यसबारे बहस हुनसक्छ । तर कसैले माओवादी आन्दोलनको एउटा पाटोबारे चर्चा गर्यो भन्दैमा आवेगमा आउनुपर्ने म ठान्दिनँ,’ सपुतको चर्चामा रहेको गीतबारे धनगढीमा आयोजित पत्रकार सम्मेलनमा सोधिएको जिज्ञासामा प्रचण्डले भने ।

प्रचण्डले गायक प्रकाश सपुतको प्रशंसासमेत गरे । सपुतले सिर्जनात्मक ढंगले गीत बनाउने गरेको प्रचण्डको भनाइ छ ।

प्रचण्डले माओवादी जनयुद्धलाई एउटा पाटोबाट मात्र हेर्दा वस्तुगत नहुने भएकाले सबैतिरबाट पर्गेल्नुपर्ने आवश्यकता औंल्याए ।