काठमाडौं । आइसिसी वल्र्ड कप लिग २ का दुई खेलमा कम्तिमा ९ विकेट लिन सके नेपालका सन्दीप लामिछानेले दुर्लभ विश्व कीर्तिमान कायम गर्ने भएका छन् । सन्दीपले यस अघि १६ खेलमा ४१ विकेट लिएका छन् ।

अबको युएई र पपुवा न्युगिनीविरुद्धका दुई खेलमा ९ विकेट लिन सके सन्दीपले विश्वकीर्तिमान आफ्नो नाममा लेखाउनेछन् । यस अघि १९ खेलमा ५० विकेट पूरा गर्ने विश्वकीर्तिमान श्रीलंककाका अजन्था मेन्डिसको नाममा रहेको छ । दुई खेलमा ९ विकेट लिन सक्दा सन्दीपको नाममा विश्व कीर्तिमान बन्न सक्नेछ । तीन खेलबाट ९ विकेट लिए मेन्डिससँगै सन्दीपले विश्व कीर्तिमानमा बराबरी गर्नेछन् ।

तर लगातारका दुई खेलमा ९ विकेट लिन निक्कै जादुमयी बलिङ गर्नुपर्नेछ । लगातारका तीन खेल प्रत्येकमा ९ विकेट लिन सक्दा पनि उनले विश्व कीर्तिमान कायम भने गर्नेछन् ।

कम खेलमा ५० विकेट छिटो पूरा गर्ने खेलाडीमा भारतका अजित अगरकर दोस्रो स्थानमा छन् । उनले २३ खेल खेल्दै ५० विकेट पूरा गरेका छन् । सन्दीपले एक दुई विकेट नियमित लिंदा पनि अगरकरको रेकर्ड भने तोड्न सक्नेछन् । किनकी  त्यस्तै न्युजिल्याण्डका मिचेल म्याकलेनघानले पनि २३ खेलमा ५० विकेट पूरा गरेका छन् । २४ खेलमा ५० विकेट पूरा गर्ने खेडालीको सूचीमा अष्ट्रेलियाका डेनिस लेली, पाकिस्तानका हसन अली, भारतका कुलदीप यादव र अष्ट्रेलिया शेन वार्न छन् । साहिद अफ्रिदीले पाकिस्तानबाट २५ र राशिद खानले अफगानिस्तानबाट २६ खेलमा ५० विकेट लिएका थिए ।

यी सबै प्रभावशाली खेलाडीलाई पछि पार्दै वर्षौसम्म कीर्तिमान आफ्नो नाममा लेखाउने अवसरको पर्खाईमा सन्दीप छन् । सन्दीपले १६ म्याचका १५ इनिङसमा ४१ विकेट लिएका छन् । यस क्रममा उनले ५०८ रन दिएका छन् ।