काठमाडाैं । गत साताको अन्तिम दुई कारोबार दिनदेखि ओरालो लागिरहेको नेप्सेले यस साताको पहिलो कारोबार दिनमा पनि त्यसैलाई निरन्तरता दिएको छ । आइतबार नेप्से परिसूचक १४.६७ अंक घटेर २६१६.५८ विन्दुमा झरेको छ ।

त्यसैगरी, यस दिन सेन्सेटिभ इण्डेक्स ३.०१ अंक घटेको छ भने फ्लोट इण्डेक्स ०.८४ अंक र सेन्सेटिभ फ्लोट इण्डेक्स ०.८१ अंक घटेको छ।

यस दिन नेप्सेसँगै कारोबार रकम पनि घटेको छ । अघिल्लो कारोबार दिन साढे २ अर्बभन्दा बढीको शेयर खरिदबिक्री भएको बजारमा यस दिन २२४ कम्पनीकाे ४२ लाख ८७ हजार कित्ता सेयर खरिदबिक्री हुँदा २ अर्ब २७ करोड ४६ लाख २६ हजार रुपैयाँ बराबरको कारोबार  भएको छ।

आइतबार लगानी उपसमूहको परिसूचक बाहेक अन्य सबै उपसमूहको परिसूचक घटेको छ । लगानी उपसमूहको परिसूचक यस दिन १.६६ प्रतिशत बढेको छ। यस दिन विकास बैंक, वित्त, होटल तथा पर्यटन, जीवन बीमा, उत्पादन तथा प्रशोधन, अन्य र व्यापार उपसमूहको परिसूचक १ प्रतिशतभन्दा बढी घटेका छन्।

कारोबार रकमका आधारमा यस दिन नेपाल लाइफ इन्स्योरेन्स शीर्ष स्थानमा रहेको छ । इन्स्योरेन्सको यस दिन १६ करोड २९ लाख रुपैयाँभन्दा बढीको सेयर कारोबार भएको छ। त्यसैगरी, यस दिन जीवन विकास लघुवित्तको १३ करोड ४२ लाख रुपैयाँ बराबरको सेयर खरिदबिक्री भएको छ।