काठमाडौं । बहुक्षेत्रीय प्राविधिक तथा आर्थिक सहयोगका लागि बङ्गाल खाडीको प्रयास (बिम्स्टेक)को १८ औँ मन्त्रिस्तरीय बैठकमा भागलिने सिलसिलमा श्रीलङ्काको कोलम्बोमा रहेका परराष्ट्रमन्त्री डा. नारायण खड्का आज बिहानैदेखि द्विपक्षीय भेटवार्तामा व्यस्त भएका छन् ।

आज बिहान उनले आफ्ना भारतीय समकक्षी सुव्रमन्यम् जयशङ्करसँग भेटवार्ता गरेका थिए अपराह्न बङ्गलादेश र थाइल्याण्डका विदेशमन्त्रीलाई बेग्लाबेग्लै भेटेर द्विपक्षीय एवं बहुपक्षीय चासोका विविध विषयमा विचारविमर्श गरेको परराष्ट्र मन्त्रालयले जनाएको छ ।

मन्त्री खड्काले थाइल्याण्डका उपप्रधानमन्त्री एवं परराष्ट्रमन्त्री दोन प्रमुदिनाई र बङ्गलादेशका विदेशमन्त्री ए के अब्दुल मोमनसँगको भेटमा व्यापार, लगानी तथा पर्यटन प्रवद्र्धनबारे छलफल गरेका थिए ।

यसैबीच, मन्त्री खड्काले मन्त्रिस्तरीय बैठकलाई सम्बोधन गर्दै बिम्स्टेकको पुनरुत्थानका लागि नवीकरणीय सङ्कल्प, सामूहिक प्रतिबद्धता र ठोस कार्यमा जोड दिए । सङ्गठनलाई गतिशील तुल्याउन वर्तमान चुनौतीअनुरुप नवीन मार्गहरू पहिल्याउनुपर्ने उनले बताए ।