काठमाडौं । नेकपा (माओवादी क्रान्तिकारी)का नेता सीपी गजुरेलले सत्तामा रहेका कम्युनिष्टहरूलाई कुहिएको अण्डाको संज्ञा दिएका छन् । वैज्ञानिक समाजवादी कम्युनिष्ट पार्टीको भेलालाई काठमाडौंमा सम्बोधन गर्दै उनले कुखुराको कुहिएको अण्डाका कारण देश नै गनाउने भएको टिप्पणी गरे ।

‘बाहिर मिडियाले नेपालमा जस्तो कम्युनिष्ट कतै छैन भनेर हल्ला गरेका छन् । सत्तामा पनि कम्युनिष्ट छन् । प्रतिपक्षमा पनि कम्युनिष्ट छन् । सडकमा पनि कम्युनिष्ट छन् । राष्ट्र घात गर्नेपनि कम्युनिष्ट छन् । राष्ट्रघातको विरोध गर्ने पनि कम्युनिष्ट छन्’, उनले भने, ‘यसो हेर्दा जताततै कम्युनिष्ट छन् । प्रचण्डलाई आफु जस्तो कम्युनिष्ट कोही छैन जस्तो लाग्छ । ओलीजी त आफु बाहेक अन्यलाई कम्युनिष्ट नै देख्नुहुन्न । वास्तवमा त्यस्तो होइन । हामी भनेको शक्तिसहितको अण्डा हो । उनीहरू कुहिएको अण्डा हो ।’

कुहिएको अण्डाका विरुद्ध सच्चा क्रान्तिकारी शक्तिहरू एक जुट हुनुपर्ने  उनले बताए ।