काठमाडौं । सशस्त्र प्रहरी बलका विभिन्न सेवाका पाँच प्रहरी नायब महानिरीक्षक (डिआइजी) को सरुवा तथा पदस्थापन गरिएको छ । सशस्त्रको प्राविधिक समूह, सञ्चार तथा इन्जिनियरिङ, प्राविधिक, स्वास्थ्य र साधारण उपसमूहतर्फका बढुवा नियुक्त भएका डिआइजीको गृह मन्त्रालयले सरुवा तथा पदस्थापन गरेको हो ।

सशस्त्रको आर्थिक प्रशासन महाशाखा दरबन्दी रहेका विदुर खड्कालाई सहायक महानिरीक्षकको सचिवालय, मानव स्रोत विभाग दरबन्दी रहेका लक्ष्मणबहादुर सिंहलाई कार्य तथा सुरक्षा सीमा सुरक्षा विभाग र शान्ति स्थापना तालिम शिक्षालय, ककनीमा दरबन्दी रहेका प्रदीपकुमार पन्तलाई राष्ट्रिय सुरक्षा परिषद्को सचिवालय सिंहदरबारमा सरुवा गरिएको छ ।

सशस्त्र प्रहरी बल नेपाल, कार्य तथा सीमा सुरक्षा विभागमा कार्यरत इञ्जिनियर सन्दीप थापा र नेपाल एपिएफ अस्पतालका डा. रूपक महर्जनलाई भने पदोन्नतिपछि पनि सोही स्थानमा पदस्थापन गरिएको सशस्त्र प्रहरी महानिरीक्षकको सचिवालयले जनाएको छ ।