काठमाडौं । सर्वोच्च अदालतले निलम्बित प्रधानन्यायाधीश चोलेन्द्रशमशेर राणाविरुद्धको महाभियोग प्रस्तावसँग सम्बन्धित कागजातहरू झिकाउन आदेश दिएको छ ।

महाअभियोगविरुद्ध सर्वोच्चमा परेको रिटमाथि प्रारम्भिक सुनुवाइ गर्दै शुक्रबार संवैधानिक इजलासले कागजात झिकाउन आदेश दिएको हो ।
अधिवक्ता डा. पुण्यप्रसाद खतिवडाले महाभियोगविरुद्ध सर्वोच्चमा रिट निवेदन पेश गरेका थिए ।

कायममुकायम प्रधानन्यायाधीश दीपककुमार कार्की, न्यायाधीशहरू ईश्वरप्रसाद खतिवडा, डा. आनन्दमोहन भट्टराई, प्रकाशमानसिंह राउत र तेजबहादुर केसीसहितको संवैधानिक इजलासले अधिवक्ता त्रिलोकबहादुर चन्दले पेश गरेको अर्को निवेदनलाई साथैराख्न आदेश दिएको छ ।

प्रधानन्यायाधीश राणाले सर्वोच्चको गरिमामा आँच आउनेगरी गतिविधि बढाएको, राजनीतिक दलहरूसँग भागबण्डाको लागि बार्गेनिङ गरेकोलगायत आरोप लगाउँदै फागुन १ मा सत्तापक्ष कांग्रेस, माओवादी र एकीकृत समाजवादीका ९८ सांसदले संसद् सचिवालयमा उनीविरुद्ध महाभियोग दर्ता गराएका थिए ।