किएभ । रुसी आक्रमणको करिब डेढ महिनापछि युक्रेनी सहरहरूमा अलिअलि भए पनि परिवर्तन आउन थालेको छ । अहिले युक्रेनीहरू देश फर्किरहेका छन् । संयुक्त राष्ट्र संघको मानवीय मामिला समन्वय कार्यालयका अनुसार हरेक दिन ३० हजारभन्दा बढी मानिस युक्रेन फर्किरहेका छन् ।

युद्ध सुरू भएपछि देश छाेडेर हिँडेकाहरू पश्चिमी युक्रेन र छिमेकी देशहरूमा बस्दै आएका थिए । युक्रेनले वयस्क पुरुषलाई देश छाड्न प्रतिबन्ध लगाएका कारण फर्किनेमा अधिकांश महिला र बालबालिका रहेका छन् ।

रुसी सेनाहरू अहिले राजधानी किएभ र वरपरका सहरहरूबाट फर्किरहेका छन् । यही कारणले गर्दा अधिकांश युक्रेनीहरू किएभ फर्किन थालेका हुन् ।

युद्ध सुरु भएको झन्डै दुई महिना पुग्न लाग्दा ७० लाखभन्दा बढी मानिस देशभित्र र बाहिर विस्थापित भएको आप्रवासनका लागि अन्तर्राष्ट्रिय संगठन आइओएमले जनाएको छ ।

रुसले अझै पनि युक्रेनका धेरै सहरमा बम विस्फोट गरिरहेको छ । रुसले आइतबार युक्रेनी सेनालाई मरिउपोलमा आत्मसमर्पण गर्न अल्टिमेटम दिएको थियो । तर युक्रेनी सेनाले आत्मसमर्पण गर्न अस्वीकार गरेको छ ।

कति पुग्यो युद्धमा ज्यान गुमाउने युक्रेनी सैनिकको संख्या ?