काठमाडौं । लोकतान्त्रिक समाजवादी पार्टी (लोसपा)का वरिष्ठ नेता राजेन्द्र महतो सुनियोजित रूपमा आफ्नो फेसबुक ह्याक भएको बताएका छन् ।

उनले फेसबुक ह्याक गर्नेलाई कानुनी दायरामा ल्याउन पहल गर्नेसमेत जानकारी दिएका छन् ।

‘मेरो फेसबुक ह्याक गरी सुनियोजित रूपमा कसैले मैले पार्टी परित्याग गरेको हल्ला फैलाएकोप्रति मेरो गम्भीर ध्यानाकर्षण भएको छ’, उनले फेसबुकमा लेखेका छन्, ‘यसमा कुनै सत्यता नरहेको प्रष्ट पार्न चाहन्छु । यस्तो घृणित कार्य गर्नेलाई तुरुन्त कानुनी प्रक्रियाको दाइरामा ल्याउन पहल गर्नेछु ।’

नेता महतोको फेसबुक ह्याक गरेपछि ह्याकरले उनले लोसपा परित्याग गरेको घोषणा गरेको थियो ।

‘लोकतान्त्रिक समाजवादी पार्टी नेपालसँगको यात्रालाई आजबाट पूर्ण रूपले बिराम दिएको छु’, फेसबुकमा लेखिएको थियो, ‘यात्रालाई सहज र सरल बनाउन सहयोग गर्नुभएका सम्पूर्ण साथी, सुभचिन्तक र पार्टीका सदस्यहरूलाई हृदयदेखि धन्यवाद !’

राजेन्द्र महतोको फेसबुक ह्याक गरेपछि ह्याकरले यस्तो लेखेको थियो !