काठमाडौं । युट्युब र सामाजिक सञ्जालमा ‘भाइरल’ भएका पुण्य गौतम माधवकुमार नेपाल नेतृत्वको नेकपा (एकीकृत समाजवादी) छोडेर नेकपा (एमाले)मा प्रवेश गरेका छन् ।

आज काठमाडौंको भृकुटीमण्डपमा आयोजित चुनावी सभामा उनलाई अध्यक्ष केपी शर्मा ओलीले एमालेमा प्रवेश गराएका हुन् ।

अध्यक्ष ओलीले गौतमलाई एमालेको झण्डा प्रदान गरेका थिए । यसलगत्तै गौतमले ओलीको खुट्टा ढोगेका थिए ।

एमाले प्रवेश गरेपछि सम्बोधन गर्दै गौतमले अहिलेको दुनियाँमा ओलीलाई राजनेताको संज्ञा दिँदै उनको स्थान भ्लादिमिर पुटिन र सि जिनपिङको जस्तै भएको बताए ।

२०४५ सालमा नेकपा मसालबाट राजनीति सुरु गरेका गौतम एकता केन्द्र हुँदै माओवादीमा लागेका थिए ।

जनयुद्धमा पनि सक्रिय रुपमा होमिएका उनी शान्ति प्रक्रियापछि लामो समय निष्क्रिय भए ।

एमाले र माओवादी केन्द्र एकतापछि उनी नेकपमा सक्रिय भए । तर, नेकपा फुट्दा गौतम एमालेमा लागेका थिए । एमाले पनि फुटेर नेता नेपालले नयाँ पार्टी खोल्दा उनी उतै लागे । तर, अहिले नेकपा एस कांग्रेसको पछि लागेकोमा असन्तुष्टि जनाउँदै आफू एमालेका प्रवेश गरेको उनले बताएका छन् ।

साथै, एमसिसी पारित गर्दा नेकपा एसले पक्षमा मतदान गरेकोप्रति पनि उनले असन्तुष्टि जनाउँदै आएका छन् ।

पुण्य गौतम नेकपा एस छोडेर एमालेमा – NepalWatch