काठमाडाैं । अन्तर्राष्ट्रिय बजारमा चालु आवको चैत्र मसान्तसम्ममा कच्चा पेट्रोलियम पदार्थको मूल्य ७२.७ प्रतिशतले वृद्धि भई अमेरिकी डलर १०८.४९ पुगेको छ । गत वर्षको सोही अवधिममा पेट्रोलियम पदार्थको मूल्य प्रति ब्यारल अमेरिकी डलर ६२.८३ रहेको थियो ।

रूस-युक्रेन युद्धले अन्तर्राष्ट्रिय बजारमा कच्चा तेलको मूल्य बढ्ने क्रम जारी छ । यसको असर नेपालमा पनि परेको छ । नेपालमा पछिल्लो समय पेट्रोलिम पदार्थको मूल्य आकाशिएको अवस्था छ । हाल पेट्रोलको मूल्य प्रतिलिटर १६० रूपैयाँ र डिजेल १४३ रूपैयाँ रहेको छ । निगमका अनुसार पेट्रोलमा मात्रै निगमले प्रतिलिटर २३ रूपैयाँ घाटा व्योहर्नुपरेको छ । निगमले मे महिनामा मात्रै इन्डिन आयल कोर्पेशनलाई १० अर्ब भन्दा बढी भुक्तानी गर्न बाँकी छ ।

त्यस्तै खाना पकाउने ग्याँसको मूल्य हाल १ हजार ६ सय रूपैयाँ पुगेको छ । निगमले इन्डियाबाट ग्याँस ल्याउँदा प्रतिसिलिण्डर एक हजार ५० घाटा व्योहोरिरहेको निगमले जनाएको छ ।

त्यसैगरी, अन्तर्राष्ट्रिय बजारमा चालु आवको चैत्र मसान्तसम्ममा सुनको मूल्य १३.१ प्रतिशतले वृद्धि भई अमेरिकी डलर १९७६.७५ पुगेको छ । गत वर्षको सोही अवधिमा सुनको मूल्य अमेरिकी डलर १७४७.९५ रहेको थियो ।

सुनको पछिल्लो अपडेट हेर्ने हो भने घढबढ हुने क्रम जारी छ । आजकै मूल्य अनुसार छापावल सुन प्रतितोला ९७ हजार ८ सय रूपैयाँ र तेजावी सुन ९७ हजार तीन सय रूपैयाँमा कारोबार भइरहेको छ ।