काठमाडौं । दोलखाको बैतेश्वर गाउँपालिकामा नेपाली कांग्रेसले बुथ कब्जा गर्न खोजेको भन्दै अन्य दल प्रदर्शनमा उत्रिएपछि तनाव भएको छ ।

गाउँपालिकाको वडा नं. १ र २ स्थित मतदान केन्द्रमा मतदान सुरु नहुँदै तनाव भएको हो । एमालेलगायत विपक्षी दलले कांग्रेसले बुथ कब्जाको प्रयास गरेको भन्दै त्यहाँ प्रदर्शन गरिरहेका छन् ।

तनावपछि त्यहाँको अवस्था नियन्त्रणमा लिन प्रहरीले दुई राउण्ड हवाई फायर नै गर्नुपरेको दोलखाका प्रमुख जिल्ला अधिकारी भोजराज खतिवडाले जानकारी दिए ।

एमालेलगायत विपक्षीले कांग्रेसबाट बुथ कब्जाको प्रयास भएको आरोप लगाए पनि दोलखाका प्रमुख जिल्ला अधिकारी भोजराज खतिवडाले भने सामान्य वाद-विवादले तनावको रूप लिएको बताए ।

‘राजनीतिक दलबीच केही विषयमा सहमति नहुँदा विवाद भएको हो । बाहिर प्रचारमा आएजस्तो बुथकब्जाको प्रयास भएको होइन,’ उनले नेपालवाचसँग भने ।

उनका अनुसार, अहिले त्यहाँको अवस्था नियन्त्रणमा आएको छ र दलबीच छलफल गराएर मतदान सञ्चालन गर्ने प्रयास भइरहेको छ ।