तनहुँ । गंगादेवी बाख्रा फार्म सञ्चालक देवीप्रसाद र गंगादेवी अधिकारीले बाख्रापालनबाट राम्रो कमाइ गर्दै आएकी छिन् । डेढ लाख लगानी गरेर आठ बाख्राबाट व्यवसाय सुरु गरेका अधिकारी दम्पतिले अहिले एक करोड बढी लगानी गरिसकेका छन् । व्यास नगरपालिका-४ स्थित चरेखोल्सीमा करिब ३६ रोपनी क्षेत्रफलमा विभिन्न प्रजातिका घाँस लगाएर व्यवस्थित तरिकाले बाख्रापालन गरेका हुन् ।

हालसम्म बैंकको ऋण, अनुदान र आफ्नो लगानीसमेत गरी करिब एक करोड लगानी भएको फार्म सञ्चालक गंगादेवीले जानकारी दिइन् । करिब एक सयको हाराहारीमा बाख्रा छन् । अष्ट्रेलियाबाट तीन लाख मूल्यमा एक बोका खरिद गरेर ल्याएको फार्म सञ्चालक देवीप्रसादले बताए ।

नेपाल लाइभस्टक सेक्टर इनोभेसन आयोजना विकेन्द्रीकृत आयोजना सहयोग एकाइ पोखराको बीस लाख पचास हजार अनुदान दिने भएकाले हालै मात्र सम्झौता गरिएको उनले जानकारी दिए ।