काठमाडौं । नेकपा एकीकृत समाजवादीले सरकारमा सहभागी भएका आफ्ना मन्त्रीलाई फिर्ता बोलाउने निर्णय गरेको छ । पार्टी कार्यलय बानेश्वारमा आइतबार बसेको सचिवालय बैठकले चार मन्त्रीलाई २४ घण्टाभित्र फिर्ता बोलाउने निर्णय गरेको हो ।

एमाले विभाजन पश्चात् नयाँ पार्टी गठन भएपछि शेरबहादुर देउवा नेतृत्वको सरकारमा चार मन्त्री र एक राज्यमन्त्री सहभागी भएका थिए । सरकारमा सहभागी एक राज्यमन्त्री भवानी खापुङबाहेक सबै मन्त्रीलाई फिर्ता बोलाइएको एक नेताले जानकारी दिएका छन् ।

‘सचिवालय बैठकले पार्टीकोतर्फबाट सरकारमा सहभागी चारजना मन्त्रीलाई २४ घण्टाभित्र फिर्ता बोलाउने निर्णय भएको छ’, सहभागी एक नेताले भने, ‘रिक्त स्थानमा कसलाई पठाउने भन्नेबारे छलफल जारी छ । सायद भोलिसम्ममा टुंगोमा पुग्छौं ।’

नेकपा एसबाट सहभागी मन्त्रीहरूले जनताको पक्षमा राम्रो काम गर्न नसकेको भन्दै मन्त्रीहरूको पार्टीभित्र तीव्र आलोचना भइरहेको थियो । फिर्ता बोलाइएका मन्त्रीहरूमा सरकारमा नेतृत्वसमेत गरेका स्वस्थ्यमन्त्री विरोध खतिवडा, सहरी विकासमन्त्री रामकुमारी झाँक्री, श्रममन्त्री किसनकुमार श्रेष्ठ र पर्यटनमन्त्री प्रेम आले छन् ।