काठमाडौं । एएफसी एसियन कप छनोटको तेस्रो चरणअन्तर्गत आज नेपाल र इन्डोनेसिया प्रतिस्पर्धा गर्दैछन् ।

खेल कुवेतको जाबिर अल अहमद स्टेडियममा नेपाली समयअनुसार राति १ बजे सुरु हुनेछ ।

यसअघि भएका दुई खेल नेपाललाई फापेको छैन । बुधबार जोर्डनसँग २–० र शनिबार आयोजक कुवेतसँग नेपाल ४–१ गोल अन्तरले पराजित भएको थियो ।

पहिलो जित निकाल्नुपर्ने दबाबमा रहेको नेपाल इण्डोनेसियाविरुद्ध मैदानमा खडा हुँदैछ । इण्डोनेसिया बलियो टिम मानिन्छ । त्यसैले आजको प्रतिस्पर्धा नेपालका लागि त्यति सहज छैन ।

आजको खेलमा जित निकाले पनि एसियन कपमा नेपालको सम्भावना समाप्त भइसकेको छ । त्यसैले आजको प्रतिस्पर्धा प्रतिष्ठाको हुनेछ ।

एएफसी एसियन कप छनोटको समूह ‘ए’ मा रहेको नेपाल हालसम्म अंकविहीन रहँदै पुछारमा छ भने २ खेलमा ३ अंक जोडेर इण्डोनेसिया दोस्रो स्थानमा छ ।