काठमडौं । प्रधानमन्त्री शेरबहादुर देउवाको स्वास्थ्य अवस्थाबारे संसदमा प्रश्न उठेको छ । नेमकिपाका सांसद प्रेम सुवालले प्रधानमन्त्री शेरबहादुर देउवाको स्वास्थ्य अवस्थाबारे सभामुखसँग प्रश्न गरेका हुन् ।

अमेरिकाले अघि सारेको स्टेट पार्टनरसिप प्रोगाम(एसपिपी) माथि प्रधानमन्त्री देउवा संसदमा उपस्थित भएर जवाफ दिने कार्यक्रम थियो ।
तर देउवाले आफु उपस्थित नभएर गृह मन्त्री बालकृष्ण खाँडलाई अघि सारेपछि सांसद सुवालले स्वास्थ्य अवस्था खराब भएको अवस्थाबाहेक प्रधानमन्त्री स्वयम्

संसदमा उपस्थित भएर जवाफ माग गरेका हुन् । स्वास्थ्य अवस्था खराब भएको भए त्यसको जानकारी हुनुपर्ने माग गरेका हुन् ।

अमेरिकाले अघि सारेको स्टेट पार्टनरसिप प्रोगाम(एसपिपी) सम्झौताका लागि अमेरिका भ्रमणमा जान लागेको विषयलाई लिएर प्रधानमन्त्री देउवा यतिबेला विवादमा छन् ।

प्रतिनिधि सभा बैठकमा अधिकांश सांसदहरूले उनको भ्रमणबारे सांसदमा आएर जवाफ दिन माग गरेका थिए । तर, कार्यव्यस्ततालाई कारण बनाउँदै प्रधानमन्त्री देउवा आज सांसदमा हाजिर भएनन् । उनको जवाफ बोकेर गृहमन्त्री बालकृष्ण खाँड संसदमा हाजिर भएका छन् ।

प्रधानमन्त्री देउवा यो विषयमा जवाफदेही नभएको भन्दै सुवालले उनको उपस्थितीका माग गरेका हुन् । ‘सामान्य बैठकले संसदलाई छोड्न मिल्दैन,’ उनले भने, ‘अस्पतालमा भर्ना भएको भए डाक्टरको प्रेस्कृप्सन चाहियो । विरामी भएको र कार्य व्यवस्तताको नाममा सधैं अरुलाई जवाफ पठाएर पन्छिन मिल्दैन ।’