काठमाडौं । स्वास्थ्य तथा जनसंख्या मन्त्रालयले काठमाडौंको बागबजारमा बस्ने एकै घरका दुई दिदिबहिनीलाई हैजा भएको पुष्टि गरेको छ । मन्त्रालयले विज्ञप्ती जारी गर्दै उक्त जानकारी गराएको हो ।

टेकुस्थित शुक्रराज ट्रपिकल तथा सरुवा रोग अस्पतालमा असार ३ गते भर्ना भएका दुई दिदिबहिनीलाई झाडापखालाको लक्षण देखिएको थियो ।

उक्त दिदिबहिनीको संकलित नमुना परीक्षण गर्दा हैजाको जिवाणु पत्ता लागेको मन्त्रालयले जानकारी गराएको छ । अहिले उनीहरुको शुक्रराज ट्रपिकलमा उपचार भइरहेको छ ।

मन्त्रालयले विज्ञप्तिमार्फत सबै उपत्यकावालाई सर्तक रहन तथा हैजासम्बन्धि लक्षण देखिएमा स्वास्थ्य संस्थामा सम्पर्क गर्नसमेत आग्रह गरेको छ ।