काठमाडौं । महिला रेस्लर अस्मिता जुरेलीले राष्ट्रिय युवा संघका केन्द्रीय सदस्य हिक्मत बोहोरा(हिलारी) विरूद्ध प्रहरीमा उजुरी दिएकी छिन् ।

ललितपुरको फर्सीडोलमा असार १५ मा युवासंघले आयोजना गरेको धान दिवसको अवसरमा आफूमाथि बोहोराले दुर्व्यवहार गरेको भन्दै उनले जिल्ला प्रहरी परिसर ललितपुरमा उजुरी दिएकी हुन् । जुरेलीको उजुरीमाथि थप अनुसन्धान अगाडि बढाइएको प्रहरीका एक उच्च अधिकृतले जानकारी दिएका छन् ।

एमाले महासचिव शंकर पोखरेल सहभागी रहेको उक्त रोपाईं कार्यक्रममा बोहोराले जुरेलीलाई समातेर हिलोमा लडाएका थिए । अभद्र व्यवहारबाट रिसाएकी जुरेली र बोहोराबीच घम्साघम्सी हुँदै उनको कपडासमेत  च्यातिएिको भिडियोमा देख्न सकिन्छ ।

उक्त कार्यक्रमा युवासंघको फ्याक्सन इन्चार्ज महेश बस्नेत, नायिका करिष्मा मानन्धरलगायतको उपस्थिति रहेको थियो । गतवर्ष पनि गायक छत्र शाही र जुरेलीबीच हिलो खेलाई अश्लीलता भएको भन्दै तीव्र आलोचना भएको थियो ।