काठमाडौं । सरकारले अमेरिकी स्टेट पार्टनरसीप प्रोग्राम (एसपिपी)मा सहभागी नहुने पत्र अमेरिकालाई अहिलेसम्म पनि नपठाएको खुलासा भएको छ ।

निर्णय गरेको दुई साता पुग्न लाग्दा पनि अमेरिकालाई पत्राचार नगरेको तथ्य स्वयम् सरकारले नै सार्वजनिक गरेको हो ।

परराष्ट्र मन्त्रालयमा आइतबार आयोजित पत्रकार सम्मेलनमा प्रवक्ता सेवा लम्सालले एसपिपीमा सहभागी नहुने भन्दै अमेरिकी सरकारलाई गर्ने पत्रबारे अध्ययन भइरहकाले हालसम्म नपठाएको बताइन् ।

असार ६ मा बसेको मन्त्रिपरिषद् बैठकले एसपिपीमा सहभागी नहुने भनेर अमेरिकालाई पत्र लेख्ने निर्णय गरेको थियो । सो निर्णय परराष्ट्रलाई प्राप्त भइसकेको जानकारी दिँदै उनले भनिन्, ‘सरकारको निर्णय मन्त्रालयले प्राप्त भएको छ । त्यसलाई कूटनीतिक माध्यमबाट कार्यान्वयन गर्दै पत्राचार गरिने छ ।’