काठमाडौं । विदेशबाट सुन तस्करी गर्नेहरूले पछिल्लो समय विभिन्न उपाय अपनाउँदै आइरहेका छन् । यसैबीच, आज अर्को नयाँ तरिका अपनाइएको पाइएको छ ।

सुन तस्करले नाबालकको कपडाको बटनभित्र सुन लुकाएर ल्याएको पाइएको छ । यसरी नाबालकको कपडाको बटमभित्र सुन लुकाएर ल्याइरहेका एक जनालाई आज नियन्त्रणमा लिइएको छ ।

त्रिभुवन विमानस्थल भन्सार कार्यालयले सुमन दमाईँलाई पक्राउ गरेको हो ।

सोमबार बिहान करिब ११ बजे दुबईबाट काठमाडौं आएका दमाईँको लगेज जाँच गर्ने क्रममा नाबालकले लगाउने सिङ्गल पिस पोशाक ५ थानको टाँक (स्टिल बटन) भित्र लुकाइछिपाइ राखिएको ६० वटा सुनका रिङ फेला परेको प्रहरीले जनाएको छ ।

सुनको तौल करिब १२५ ग्राम रहेको बताइएको छ ।

सुनसहित दमाईँलाई नियन्त्रणमा लिइ थप अनुसन्धान अगाडि बढाइएको भन्सार कार्यालयले जनाएको छ ।