काठमाडौं । चिनियाँ कम्युनिस्ट पार्टी (सिपिसी) का विदेश विभाग प्रमुख लिउ जियानचाओ चारदिने औपचारिक भ्रमणका लागि आइतबारदेखि नेपालमा छन् ।

भ्रमणको पहिलो दिन नेता लिउले प्रधानमन्त्री शेरबहादुर देउवा र परराष्ट्र मन्त्री नारायण खड्कासँग भेटवार्ता गरे । उनले सोमबार पनि यो श्रृंखलालाई जारी राख्दै विभिन्न राजनीतिक दलका शीर्ष नेतासँग भलाकुसारी गर्दैछन् ।

नेता लिउले सोमबार अपराह्न चार बजे नेकपा माओवादी केन्द्रका अध्यक्ष प्रचण्डसँग भेटवार्ता गर्ने तय भएको छ । त्यसका लागि प्रचण्डले खुमलटारस्थित आफ्नो निवासमा आउन लिउलाई निम्तो दिएका छन् ।

राष्ट्रपति विद्यादेवी भण्डारी, नेकपा एमालेका अध्यक्ष केपी शर्मा ओली, एकीकृत समाजवादीका अध्यक्ष माधवकुमार नेपाललगायत पनि उनले भेट गर्ने कार्यक्रम छ । राष्ट्रपतिसँगको भेटवार्ताका लागि मंगलबार बिहानको समय तय भएको बताइएको छ ।

उनी बुधबार स्वदेश फर्कंने सेड्युल छ ।