काठमाडौं । अख्तियार दुरूपयोग अनुसन्धान आयोगले कैलालीस्थित मोहन्याल गाउँपालिकामा कार्यरत अधिकृतलाई घुससहित नियन्त्रणमा लिएको छ ।

गाउँपालिकामा कार्यरत अधिकृत दीपेन्द्र बुढा क्षेत्रीलाई ३० हजार रूपैयाँ घुस रकमसहित आयोगले नियन्त्रणमा लिएको जानकारी गराएको हो । क्षेत्रीले रकम भुक्तानी दिने क्रममा सेवाग्राहीसँग ३० हजार रूपैयाँ घुस माग गरेको भन्ने उजुरी परेको थियो ।

सोही उजुरीको आधारमा अनुसन्धान गर्दा आयोगको कन्चनपुरस्थित कार्यालयबाट खटिएको टोलीले क्षेत्रीलाई घुस लिइसकेको अवस्थामा नियन्त्रणमा लिएको हो ।

उनलाई आयोगले घोडाघोडी नगरपालिका १ स्थित होटल नवरत्नबाट आज नियन्त्रणमा लिइएको हो ।
क्षेत्रीमाथि थप अनुसन्धान भइरहेको आयोगले जनाएको छ ।