काठमाडौं । नेपाल कम्युनिस्ट पार्टीका महासचिव नेत्रविक्रम चन्द ‘विप्लव’ले संसदवादी पार्टीका नेताहरू देशको नेतृत्व गर्न असफल बनेको टिप्पणी गरेका छन् ।

पार्टीको जनपत्रिका अनलाइन उद्घाटन गर्दै उनले वर्तमान नेताहरूकै कारण देशमा राजनीतिक अस्थिरता गहिरिएको आरोप लगाए ।

विप्लवले संसदवादी पार्टीका नेताहरू जनताको काम गर्न नभएर खान र कुम्ल्याउन मात्रै मन्त्री बन्ने गरेको भन्दै कटाक्ष गरे ।

राणा शासनमा जस्तै रोलक्रम लगाएर मन्त्री बन्ने भद्दा खेल भइरहेको उनको भनाइ थियो ।

‘तीन–तीन महिनामा मन्त्री फेरेर देशको अर्थतन्त्र तहसनहस पार्ने खेल भइरहको छ । राणा शासनमा जस्तै रोलक्रम लगाएर मन्त्री बन्ने भद्दा खेल चलिरहेको छ,’ उनले भने, ‘खाने कुम्ल्याउने, जनताप्रति कुनै पनि उत्तरदायित्व छैन । यतिको भद्दा मजाक इतिहासमा कहिल्यै थिएन ।’